Milhons de euros da Junta para entidades católicas.- Fundaçons do Opus som grandes beneficiárias

Colamos do nº 119 de "Novas da Galiza" (15 outubro - 15 novembro) esta reportagem assinada por Xavi Miquel:

No ultimo ano, as subvençons às associaçons ligadas á Igreja Católica representarom um alto porcentagem de ajudas em setores públicos chave para o desenvolvemento das pessoas, como podem ser ajudas às mulheres, à dependência, ou as ajudas a pessoas migrantes. Para além, muitas destas entidades estam claramente relacionadas com o Opus Dei, e algumhas mesmo estam acusadas do roubo de crianças no Franquismo e em anos posteriores. Mas nom se trata apenas dumha política da Junta do PP, já que durante o governo do Bipartido, a Igreja tamém recebiu subvençons milionárias.

Nos últimos meses veu à tona o debate sobre o IBI da Igreja católica como outro dos privilégios de que esta instituiçom goza num Estado que se diz constitucionalmente aconfessional. Além disso, fundaçons e associaçons de obediência clerical recebem cada ano milhons de euros dos cofres públicos para as suas atividades de caráter social. Assim, a Junta evita as suas responsabilidades subsidiando associaçons com clara vocaçom ideologizadora em campos tam significativos como a educaçom, o cuidado das pessoas idosas ou os serviços à gente imigrante.

Nas últimas subvençons da Secretaria-Geral da Igualdade para entidades de iniciativa social em programas para mulheres, 339.435 euros vam para entidades intimamente relacionadas com a Igreja católica. Representa 38% do total de mais dos quase 900.000 euros que o Fundo Social Europeu destinou a este campo. As maiores quantidades vam destinadas a fundaçons estreitamente relacionadas com a Opus Dei como a Betania Jesus Nazareno ou as Siervas de la Pasión, que recebem 36.200 e 38.800 euros respetivamente para ajudas ao fomento de ocupaçom. É também de salientar que umha associaçom contrária à despenalizaçom do aborto como a Red Madre receba 55.900 euros em subsídios de ajuda às mulheres.

Outro dos aspetos importantes som os subsídios que recebem estas associaçons para a manutençom de casas destinadas a pessoas com deficiências mentais. O caso mais notável foi o convénio que a Conselharia do Bem-Estar assinou com o centro Padre Menni da Congregación Hermanas Hospitalarias, dotado com 2,5 milhons de euros cada ano. Além deste subsídio, a entidade recebeu ainda 31.734 euros para a formaçom de emprego. A Conselharia assinou também um convénio com o centro residencial regido polas Esclavas de la Virgen Dolorosa (ligada à Opus) por 1.038.441,60 euros anuais.

Menores nas maos da Igreja

Outro dos campos largamente subsidiados som os centros para imigrantes procedentes da prostituiçom. Neste campo também abundam os subsídios a entidades opostas à despenalizaçom da interrupçom da gravidez que acolhem mulheres imigrantes que exercem a prostituiçom, como e o caso das Hermanas Oblatas del Santíssimo Redentor que com a sua casa em Ferrol recebem 37.000 euros anuais. Um dos métodos destas associaçons é poremse nas portas das clínicas privadas onde se pode abortar e repartir informaçom. Outra das associaçons que recebe dinheiro para esta atividade som as Adoratrices Esclavas com 31.000 euros anuais. Esta congregaçom tornouse famosa a nível estatal, quando visionou para os alunos dum colégio concertado da Rioja vídeos de fetos esquartejados misturandoos com imagens de Zapatero.

Os centros de menores geridos pola Junta som outro dos ramos sociais que estám totalmente nas maos das entidades vinculadas direta ou indiretamente à Igreja católica. É o caso dos 104.000 euros outorgados às Hijas del Divino Cielo Rogacionistas, por um centro com oito vagas. Mas nom é apenas umha política do PP, já que durante o governo bipartido também fôrom atribuídas largas subvençons neste campo. A Vice-presidência da Igualdade e do Bem-Estar dirigida por Anxo Quintana deu 6.862.000 de euros (75 por cento do total dos subsídios) a entidades católicas pola gestom dos centros de menores.

Finalmente, temos os centros infantis onde a politica privatizadora da Junta fai que as ajudas se multipliquem. Assim seriam os 73.740 euros atribuídos a umha escola infantil de Vigo polas Siervas de la Pasión ou os mais de 200.000 euros dados a quatro escolas dirigidas polas Hijas Caridad San Vicente de Paul.

Outros serviços onde a Igreja esta a receber subvençons som os serviços caritativos, basicamente através da Cáritas (mais de 2 milhons de euros no último ano), em fomento do voluntariado, programas para a prevençom do VIH, para as pessoas sem abrigo ou em projetos internacionais como os 175.000 euros entregues à Manos Unidas para um projeto na Bolívia.

Milhares de euros para entidades acusadas de roubo de crianças

Entre os subsídios outorgados destacam vários milhares de euros que som destinados a congregaçons que nos últimos meses fôrom acusadas de roubo de crianças durante o franquismo. O caso mais notório é o das Siervas de la Pasion que é incriminada de vários roubos nos diferentes orfanatos que tem no território espanhol. O orfanato de Vigo foi denunciado por várias pessoas que supostamente fôrom entregues a pais de adopçom sem as maes biológicas terem conhecimento disso. Além do mais e tal e como relata um dos afetados, umha das freiras encarregadas do orfanato, Josefa García Veiga, cada ano ia visitar os pais de adoptivos e sempre saía com um envelope cheio de dinheiro. Esta pessoa foi entrevistada para um documentário da televisom pública catalá e a resposta à jornalista foi “que nom me entra na cabeça desvelar nada. Que te mates agora a dar voltas inutilmente, para mim é umha perda de tempo”. Nom som as únicas, assim as Hijas Caridad San Vicente de Paúl, também som acusadas destes crimes em várias casas de acolhimento que tenhem em Bilbau. Ademais de receber generosos fundos públicos, esta associaçom através da instituiçom Padre Rubinos recebeu neste ano 25 milhons de euros da Fundaçom Amancio Ortega para um novo edifício que terá lar de idosos, escola infantil ou residência de religiosas entre outras. Em 2011, a instituiçom Padre Rubinos recebeu num convénio de colaboraçom com a Conselharia da Presidência, 40.000 euros. Outras entidades que fôrom subsidiadas e que som acusadas do roubo de crianças som as Adoratrices Esclavas, as Hermanas Oblatas del Santíssimo Redentor ou as Esclavas de la Dolorosa.